Giimbestigahan karon sa kapulisan ang mga bystanders nga nangguba ug nangulata sa jeepney driver atol sa aksidente sa Yacapin–Capt. Vicente Roa Street, Cogon area, niadtong Huwebes, Abril 23 sa hapon.
Sumala ni Police Regional Office‑10 Spokesperson Police Major Joan Navarro, gikondena sa PRO‑10 ang maong binuhatan nga nahitabo human sa road accident nga nakakuha sa kinabuhi sa usa ka siyam‑anyos nga bata.
Gipahinumdom ni Navarro ang publiko nga dili makuha ang hustisya sa bisan kinsang biktima pinaagi sa pagbuhat og lain napod nga bayolenteng pamaagi.
Padayon ang imbestigasyon sa kapulisan aron mapanubag ang mga indibidwal nga misakay sa panahon ug miguba sa jeep ug mikulata sa suspetsado atol sa insidente.
Gipasabot usab ni Navarro nga gipalapad pa ang imbestigasyon aron masuta kung asa nga bahin ug lugar sa syudad ang kinahanglan pang istriktuhon ug palig‑onon ang police visibility, aron malikayan nga mautro ang susamang hitabo.
