CAGAYAN DE ORO CITY – Malaumon si Philippine Army commanding general Lt Gen Antonio Nafarrete nga makab-ot sa 4th ID ang hingpit pagpuhag sa pipila ka nabiling sakop sa North Eastern Mindanao Regional Committee ug North Central Mindanao Regional Committee sa CPP-NPA na bahad sa kahusay’g kalinaw sa rehiyon.
Kini human tahasi sa liderato sa Armadong Kusog sa Pilipinas si acting 4ID commanding general Brig Gen Seigfred Tubalado nga tiwason ang mga opensiba nga nasugdan ni retired commanding general Major General Michelle Anayron Jr batok sa nagkatibula-ag nang sakop sa duha ka CPP-NPA regional committees.
Miingon ang heneral nga kinuyugan sa kooperasyon ug disiplina sa ‘Diamond’ troopers, mas mapadali ang pagpuhag sa mga rebelde nga gitinguha mapulbos sa hingpit ni Anayron sulod ning tuiga.
Samtang giipasalig ni Tubalado nga dili mausik ang nakab-ot nga kadaugan sa tropa batok sa armadong pundok sa liderato sa CPP nga gipakatag sa pipila ka bahin sa Mindanao.
Kini ang tubag ni Tubalado nunot sa taas nga gidahom nga military achievement sa ilang kadagkuan ubos ni commanding Nafarrete.
Miingon si Tubalado nga mas mapasayon ang pagpangita sa mga nagkatibula-ag nga mga rebelde kung ipadayon sa local govt units ang pag-abag sa militar nga dugay nang mihatag sa kahusay’g kalinaw sa katawhan sa mga rehiyon sa Caraga ug Northern Mindanao.
Sila si retired commanding general Major General Michelle Anayron Jr ug Tubalado ang batchmate sa PMA Tanglaw-Diwa Class of 1992.
Hisayrang si Anayron nga tubong Misamis Oriental ang nagsilbing ika-54 nga 4ID commander samtang si Tubalado ang gikan sa 403rd IB nga nakabase sa Bukidnon.
