Gikwestyon sa Geopolitical Analyst nga si Herman Tiu Laurel ang lohika sa pakiggubat sa nasud China taliwala sa grabeng kawad-on ug kakuwang sa pagkaon, samtang iyang giklaro nga dili nato kaaway ang China, ilabi na nga nagsalig kita sa ilang padayon nga supply sa petrolyo ug LPG sa tunga-tunga sa krisis sa enerhiya.
Gibutyag ni Laurel nga dul-an sa 90 porsyento sa atong imported LPG naggikan sa China, ug bisan pa sa ilang kaugalingong emergency conservation measures, padayon silang naghatag sa tabang sa Pilipinas.
Apan, gihatagan og pagtagad sa analyst ang obserbasyon sa Chinese media nga giingong usa ka matang sa “pagluib” ang pagpahigayon sa Balikatan exercises sa South China Sea samtang ang Pilipinas padayon nga nangayo og tabang kanila.
Gitawag kini ni Laurel nga usa ka “split personality” sa foreign policy sa nasud, diin nagpakita kita og agresibong hagit sa militar nga bahin apan nagpabilin nga nagsalig sa ekonomikanhong suporta gikan sa maong silingang nasud. Sumala sa analyst, kining maong baruganan nagmugna og kalibog ug nagbutang sa Pilipinas sa usa ka delikado nga posisyon sa geopolitical arena. (jane abulag)
