Dako ang pasalamat ni City Mayor Rolando “Klarex” Uy sa City College sa mga paningkamot niini nga mapaabot sa katawhan sa syudad nga aduna nay libre nga edukasyon alang sa mga estudyante nga gustong makalampos sa kolehiyo.
Una niini, nangayo og tabang ang mayor sa mga kawani sa City College aron mas mapaila pa ang maong tunghaan sa dakbayan.
Butyag ni Mayor Uy nga tumong niini nga mas mapadool ug mahatagan og oportunidad ang mga Kagay-anon nga makab-ot ang ilang mga pangandoy alang sa maayong kaugmaon.
Hinoon, ang City College usa ka pinasahi nga programa sa lokal nga kagamhanan gawas pa sa city scholarship.
Tumong niini nga makatabang sa pagtubag sa mga problema sa pamilya, ilabi na sa aspeto sa pagpa-eskwela sa ilang mga anak taliwala sa kalisod sa kinabuhi.
