Usa ka constitutional crisis ang posibleng mahitabo kon i‑dismiss dayon sa Senado ang impeachment trial ni Vice President Sara Duterte nga wala pa gani mapaminawa ang mga ebidensya, sumala ni Atty. Jojo Lacanilao, convenor sa Duterte Panagutin Campaign Network.
Matod sa abogado, bisan pa nga adunay bag‑ong majority bloc sa Senado nga gilangkuban sa pipila ka mga senador nga giila nga duol sa mga Duterte, dili gihapon angay nga hukman dayon ang impeachment complaint nga wala pa masugdi ang hustong proseso.
Gipasabot niya nga constitutional mandate sa mga senador isip impeachment judges ang pagpaminaw sa tanang ebidensya ug pagpabiling patas sa ilang paghusga sa maong kaso.
Dugang pa ni Lacanilao, dili maayong timailhan kon adunay mga senador nga daan nang nagpahayag sa ilang posisyon bisan wala pa nila makita o madungog ang mga ebidensya nga ipresentar sa impeachment court.
Giingon usab niya nga ang mga senador kinahanglan magpabiling objective tungod kay dili lamang kini politikanhong proseso kondili usa usab ka legal ug constitutional nga obligasyon sa Senado.
Posible, matod pa, nga mosamot ang tensyon sa publiko kon i‑dismiss lamang sa Senado ang impeachment complaint nga wala hatagi og patas nga pagdungog ug legal nga proseso.
