Nanawagan ang Archdiocese of Cagayan de Oro nga ipadayon sa katawhan ang pag-ampo alang sa nasud taliwala sa nagkalain-laing isyu nga nagpalibot sa Senado ug Kongreso.
Sa interbyu, namahayag si Fr. Dear John Faborada, social communication officer sa Archdiocese of Cagayan de Oro, nga ang mga lider kinahanglan magpabiling giya ang tinuoray nga pagserbisyo alang sa kaayohan sa komunidad ug dili lamang sa interes sa pipila ka mga grupo o indibidwal.
Matod niya, pinaagi sa pag-ampo mahimong matagaan og kahayag ang mga sitwasyon ug mga suliran nga nagdala og panagbahin sa katilingban.
Gipasabot usab ni Fr. Faborada nga importante ang panaghiusa, ilabi na sa panahon nga adunay nagkadaiyang mga panghitabo sa nasud.
Dugang pa niya, ang pag-ampo alang sa mga lider usa ka paagi aron magiyaan sila sa paghimo og mga desisyon nga makahatag og kaayohan sa tanang Pilipino.
