Patung-aptong nga kaso ang gip-atubang sa 69 ka mga Chinese Nationals nga gitoohang trabahante ug nagpadagan sa planta sa Sanjia Steel Corporation, sulod sa pasilidad sa Phividec, Tagoloan Misamis Oriental.
Kini ang gibutyag ni Presidential Anti-Organized Crime Commission (PAOCC) Eexcutive Director Benjamin Acorda Jr human ilang napamatud-an, gamit ang mga ebidensya, nga adunay probable cause sa pagsang-at sa mga kaso.
Una, ang paglapas sa labor laws o pagtrabaho nga walay saktong alien employment permits, lakip na ang dili luwas nga operasyon sa planta kay walay personal protective equipment nga gisul-ob ang mga empleyado, atol sa pagronda.
Ikaduha, ang Immigration Law Violations kundiin, 52 sa mga nadakpan walay valid alien employment permits, ug 30 walay valid passports ug immigration documents.
Ikatolo, ang Nuclear Safety Regulation Violations human nasuta sa pagtuon sa mga eksperto gikan sa Philippine Nuclear Research Institute (PNRI) nga migamit ang mga trabahante sa raw materials nga adunay radioactive content, busa, posibli nga nalapas nila ang RA 6969 o mas naila isip Toxic Substances and Hazardous and Nuclear Wastes Control Act of 1990.
Ang ika-upat mao ang Consumer Protection Statutes, kundiin ang produksyon sa posibleng substandard steel products nga mahimong delikado kung gamiton sa mga estruktura.
