Opisyal nang gitudlo sa Samahang Basketbol ng Pilipinas (SBP) ang Canadian mentor nga si Burke “BT” Toews isip bag-ong head coach sa Gilas Pilipinas Women.
Gipulihan ni Toews ang dugay na nga naggunit sa nasodnong koponan nga si Patrick Aquino, kinsa maoy nahimong yawe sa pagsaka sa dungog sa nasod sa natad sa basketball.
Dako ang pagsalig sa SBP sa abilidad sa maong Canadian coach human niini gipandayan og back-to-back championships ang Fujitsu Red Wave didto sa Japan W-League.
Gilauman nga madala ni Toews ang iyang “winning culture” aron mas mapataas pa ang ranking sa Gilas Women gikan sa kasamtangang ika-30 nga pwesto sa FIBA world rankings.
Dungan niini, gitudlo usab ang veteran coach nga si Sandy Arespa-cochaga aron maoy modumala sa Gilas Pilipinas Youth Women team. (jane abulag)
