Mapalit na sa tanan merkado sa Pilipinas ang ₱53 kada kilo nga Suggested Retail Price (SRP) alang sa lokal nga bugas isip giya sa mga konsumidor.
Gibutyag saDepartment of Agriculture (DA) nga ila kining gi-implementar sugod sa adlaw’ng Miyerkules, Mayo 20.
Namahayag si Agriculture Secretary Francisco Tiu Laurel Jr., nga adunay kasabutan tali sa DA ug rice stakeholders aron mabalanse ang kita sa mga mag-uuma ug ang abilidad sa mga mamalitay.
Gipasabut sa kalihim nga dili kini price ceiling apan usa lamang ka giya sa hustong pagpresyo sa lokal nga bugas.
Gitin-aw sa opisyal nga magpabiling ₱50 kada kilo ang price cap alang sa imported five-percent broken rice sulod sa 30 ka adlaw sugod Mayo 15.
Ang basehan sa ₱50 price cap mao ang landed import cost nga ₱37–₱38 kada kilo, diin adunay allowance para sa logistics, spoilage, ug makatarunganong kita sa mga importer, trader, ug retailer.
Tuyukan sa DA ang managlahing merkado sa Pilipinas alang sa ilang hugot nga monitoring kundiin ang masakpan nga malapason silbihan sa show cause order, ayha kasuhan.
