Gikompirmar sa Police Regional Office 10 ang pagkompiskar sa mga kahimaman sa ilegal nga pagmina-mina sa gilusad nga operasyon sa kapulisan sa Brgy. Tumpagon, Cagayan de Oro City.
Sa interbyu sa BOMBO RADYO, namahayag si Police Major Joann Navaro nga ang mga kapulisan sa Police Station 8 maoy nangunay sa operasyon, inabagan sa mga kadagkuan sa Mines and Geosciences Bureau sa Department of Environment and Natural Resource (DENR-X).
Lakip sa nasikop ang usa ka lalaki nga alyas Jon, kundiin, nakompiskar kaniya ang ubay ubay nga gamit sa pagmina ug heavy equipment nga pangkalot sa yuta.
Sa pagronda sa sekretong minahan nasaksihan sa mga otoridad ang aktibong illegal mining nga nag-extract ug nagproseso sa mineralized soil nga gituohang adunay bulawan ug uban pang mineral ores.
Gawas sa ilang lookout nga si alyas Jon, kinsa nagsilbing hydrolic excavator driver, laing upat pa ka tawo nga aktong nagmina ang gipahunong sa ilang operasyon apan, nakasibat.
Gibana-bana sa P5-MILYON ang kantidad sa nakompiskar nga duha ka hydraulic excavators nga narekober sa site.
Ang mga suspek priso sa Police Station -8 samtang ang mga dagkung ekipo gikostudiya sa DENR-OMG.
