Gilaraw ni Zerlate Buranday, co-op educator ug ethics committee officer sa Oro Integrated Cooperative, ang pipila ka praktikal nga pamaagi sa husto nga pagdumala sa kwarta pinaagi sa klaro nga pagplano ug pag-monitor sa adlaw-adlaw nga gastuhan.
Una niini, iyang gitudlo ang paggamit sa tracking system diin ginatala ang tanang paggasto aron masubay kung asa gyud napunta ang kwarta ug mas mailhan ang kaugalingong spending behavior.
Dugang pa niya, iyang girekomendar ang envelope method diin ang kwarta gibahin-bahin daan para sa pagkaon, tambal, edukasyon ug uban pang panginahanglan aron mapugngan ang sobra ug walay pulos nga paggasto.
Busa, pinaagi sa maong mga pamaagi, mas dali maprioritize ang tinuod nga panginahanglan ug malikayan ang impulsive nga pagpamalit nga makadaot sa budget sa pamilya.
Giingon pa ni Buranday nga ang kombinasyon sa tracking system ug envelope method makatabang sa pagpalig-on sa disiplina ug maghatag ug mas lig-on nga pinansyal nga kahimtang sa matag panimalay.
