Gipahibalo ni Dr. Gerry J. Caño board of director sa Cagayan de Oro City Water District o COWD nga aduna silay nakalinyada nga 40 porsyento nga usbaw sa bayranan sa tubig karong tuiga.
Matud pa ni Dr. Caño nga gikinahanglan kini nga lakang aron matubag ang ilang nagkadakong problema sa Non-Revenue Water ug mapundohan ang ilang mga gikinahanglang proyekto alang sa serbisyo.
Dugang pa niya nga walay nadawat nga subsidiya ang buhatan gikan sa lokal o nasudnong pangagamhanan ug dili usab sila makapangutang sa mga bangko tungod sa kakulang sa kapasidad sa pagbayad.
Bisan pa niini gipamugos ni Dr. Caño nga ang COWD gimugna ubos sa balaod nga gidid-an sa pagpaginansya tungod kay ang tanang makolekta igahin lamang gayod sa pag-ayo sa pasilidad.
Samtang sa laing bahin, ipahigayon ang public hearing karong sunod semana aron tukion kining maong petisyon nga ipasaka sa Local Water Utilities Administration.
