Gipangatarungan sa Board of Director sa Cagayan de Oro Water District (COWD) nga si Dr. Gerry J. Caño nga gikinahanglan ang gitinguha nga 40% nga umento sa bayronon sa tubig aron mapadayon ang kalidad sa ilang serbisyo.
Dugang pa niya, basehan sa maong umento ang inflation rate, consumer price index, ug kung unsa ang makaya sa mga konsumante.
Gilantaw sab sa maong lakang ang 10-year development plan sa ahensya nga naglakip sa pag-ayo sa mga linya sa tubig aron masulbad ang 50% nga non-revenue water ug ang pagtukod og dugang mga reservoir.
Gipahibalo ni Dr. Caño nga ang kasamtangan nga rate nga 21 pesos gikan pa niadtong 2011, busa dili na kini makaapas sa pagtaas sa gasto sa kuryente, sweldo, ug uban pang palaliton karong 2026.
Sa katapusan, giklaro usab niya nga ang Local Water Utilities Administration o LWUA ang maghimo og hugot nga pagtuon sa maong petisyon uban sa himoon nga public hearing sa dili pa kini aprobahan.
