Gibarugan ni Atty. Franklin M. Quijano sa PDP Laban Iligan City nga dili angay buhian sa gobyerno ang kontrol sa energy sector ug uban pang primary industries kay delikado kini sa kaugmaon sa atong industriyalisasyon.
Gipadayag sa maong abogado nga dili maayo ang kasaysayan sa privatization sa nasod tungod kay traumatic ang resulta sa tanang mga proyekto nga gihatag sa pribadong sektor kaniadto.
Isip pananglitan, gipunto niya ang National Steel Corporation nga hingpit nga nasirado ug wala na gayuy naprodukto nga bisan usa ka kilo nga puthaw sukad kini gi-privatize.
Taliwala niini, gihatagan usab og gibug-aton ni Atty. Quijano nga ang pagbaligya sa mga planta sa kuryente sama sa Agus-Pulangi nagpakita lamang sa kahuyangan sa ekonomiya sa Pilipinas.
Sa katapusan, giingon niini nga ang pag-privatize sa mga primary industries makapawala sa kapasidad sa nasod nga makahimo sa kaugalingong mga materyales ug makapahuyang sa atong kinatibuk-ang industriya.
