Giklaro ni Bishop Joseph Lagumbay sa Catholic Universalist Church of Asia Pacific nga ang ilang ginahimo nga seremonyas alang sa mga LGBT couples usa lamang ka ceremonial blessing ug dili usa ka kasal.
Subay sa iyang pagpasabot, ang maong blessing gihimo aron giyahan ang relasyon sa mga indibidwal sa Dios ug aron mas molig-on pa kini sa espirituhanong paagi.
Dugang pa niini, gihimug-atan sa obispo nga ang grasya sa Dios para sa tanan, sama sa kahayag sa adlaw nga walay gipili kon kinsa ang masigaan.
Gipasabot usab ni Bishop Lagumbay nga ang ilang gina-hatag nga sacramental blessing dili pasabot nga perpekto na ang tawo o wala na kini makasala, tungod kay bisan sa Bibliya, daghan nang mga tawo nga nakasala ang nakadawat sa panalangin sa Ginoo.
Sa katapusan, iyang gipunting nga ang maong buhat kabahin sa paghatag og pagtagad niadtong mga tawo nga kasagaran gisalikway sa katilingban ug wala na hatagi og pagtagad sa uban.
