Mainitong gidawat ni Presidente Ferdinand Marcos Jr. sa Malacañang ang Pilgrim Image sa Our Lady of Guadalupe ang pagsugod sa 6 ka bulan nga paglibot niini sa tibuok nasud.
Kini nga sagradong replika gikan pa sa Mexico ug gikatakdang mobisita sa 54 ka mga simbahan sa Luzon, Visayas, ug Mindanao.
Lakip sa lutsan niini ang Ozamiz City karong Hulyo.
Matud sa Presidente, ang maong pagbisita nagdala og paglaum ug panaghiusa sa mga pamilyang Pilipino nga nag-atubang karon og mga pagsulay.
Kini nga pilgrimage kabahin sa pagpangandam sa tibuok kalibutan sa ika-500 nga anibersaryo sa pagpakita sa Mahal nga Birhen sa tuig 2031.
Inigkahuman sa paglibot niini karong Disyembre, permanente na nga ibutang ug i-display ang imahen sa Manila Cathedral alang sa publiko. (jane abulag)
