Gilusad sa Police Regional Office 10 ang PNP Integrity Caravan aron mas mapalig-on pa ang disiplina, integridad, ug accountability sa matag sakop sa kapulisan.
Matud pa ni PMAJ Joann Navarro spokesperson sa PRO-10, tumong sa maong programa nga masiguro nga magpabilin nga matinud-anon ug nagrespeto sa balaod ang tanang mga police officer sa ilang pagserbisyo sa katawhan.
Dugang pa niya, gilangkoban kini og tulo ka mahinungdanong bahin nga naglakip sa advocacy, education, ug community engagement aron mas mapalambo ang maayong relasyon tali sa PNP ug sa publiko.
Tungod niini, giawhag ni Navarro ang mga lumulupyo nga gamiton ang bag-ong gilusad nga Online IAS Desk sa Internal Affairs Service kung aduna silay mga reklamo o sugyot bahin sa trabaho sa mga kapulisan.
Sa katapusan, gipasabot sa maong opisyal nga kini nga inisyatiba usa ka padayon nga kampanya aron mas mapalambo pa ang transparency sa tibuok organisasyon sa kapulisan.
