Gipasalig ni Dir. Jesusa Abear, kinsa provincial director sa DTI sa Misamis Oriental, nga padayon ang ilang buhatan sa pag-monitor sa mga presyo sa school supplies samtang nagpadayun ang pag-abri sa mga klase.
Hinuon, gibutyag ni Dir. Abear nga adunay 115 ka matang sa items o Stock Keeping Units (SKU) ang ilang hugot nga gipang-susi aron maseguro nga anaa kini sulod sa gitakdang Suggested Retail Price (SRP).
Lakip sa ilang gimonitor mao ang mga notebook, intermediate pads, writing pads, ug ballpen nga gipamaligya sa mga tindahan. Dugang pa sa opisyal, ang uban niini nga mga produkto mas ubos pa gani ang presyo itandi sa SRP nga gipatuman.
Gipasabot usab ni Dir. Abear nga ang ilang gihimong pagmonitor usa ka lakang aron mapanalipdan ang mga konsumante ilabi na ang mga ginikanan sa ilang pagpamalit og gamit sa eskwela.
