Trahedya ang mihapak sa Butler, Missouri human nahagsa ang usa ka private plane kagahapon sa buntag nga mikutlo sa kinabuhi sa 12 ka tawo nga sakay niini.
Lakip sa mga nakabsan sa kinabuhi ang 11 ka skydivers ug ang 1 ka piloto nga paingon unta sa ilang skydiving activity. Sumala sa mga otoridad, nakasinati sa teknikal nga problema ang eroplano hinungdan nga nahagsa kini sa usa ka umahan duol sa Butler Memorial Airport pipila lang ka gutlo human kini milupad.
Kasamtangan nang gihimo ang lawom nga imbestigasyon sa National Transportation Safety Board ug Federal Aviation Administration aron masuta ang tinuod nga hinungdan sa maong pagkahagsa.
Sa pagkakaron, nagpadayon ang pag-ila sa mga biktima samtang nagbangutan ang mga pamilya ug ang tibuok komunidad sa maong makalilisang nga insidente.
