Wala matod pa giila ni Senator Erwin Tulfo ang gipahigayong “Blue Ribbon hearing” sa gawas sa Senado, ug gitawag kini nga usa lamang ka “sham hearing.”
Giklaro sa Senador nga walay legal nga awtoridad ang maong panagtigom sanglit dili na si Senator Pia Cayetano ang Chairman sa komite, ug dili na usab miyembro niini si Senator Rodante Marcoleta.
Dugang pa ni Tulfo, dili kini mahimong isipon nga opisyal nga proseso sa Senado tungod kay walay committee secretariat nga nag-record sa mga pamahayag.
Tungod niini, gisusi sa iyang legal team kung dunay basehan aron pasakaan og kasong “usurpation of authority” ang mga tawo nga nagpaluyo sa maong aktibidad.
Sa laing bahin, gipamatud-an sa Senate Blue Ribbon Committee nga wala silay bisan unsang pagdungog nga gi-iskedyul. (jane abulag)
