Mukabat sa kapin P1.6M nga kantidad sa salapi ang gitangag sa mga tulisan human gi-ambush ang mga empleyado sa usa ka bangko niadtong buntag sa Hunyo 17, 2026, didto sa Secondary National Highway, Sitio Miranda, Barangay Damilag, Manolo Fortich, Bukidnon.
Sumala ni PLTCOL Rogie Ortencio, Chief of Police sa Manolo Fortich Police Station,giingong gikan sa South Bank, Libona ang mga biktima sakay sa usa ka Toyota Vios sa dihang kalit silang gipabuthan sa mga suspek nga sakay sa usa ka Ford Ranger Wildtrak.
Bisan pa man sa pagsulay sa pagbalos sa security guard nga sakay sa sakyanan, napugos ang mga biktima sa paghatag sa maong kantidad tungod kay nahutdan na sila og bala.
Maayo na lang kay walay naangol sa mga empleyado nga gidala dayon ngadto sa Manolo Fortich Municipal Police Station human ang hitabo.
Sa pagkakaron, hugot nga gipahigayon sa kapulisan ang ilang Dragnet Operation aron sa pagsikop sa mga suspek nga misibat paingon sa Sayre Highway.
