Gipamugos sa Health Alliance for Democracy nga angayan na nga mag-resign si Department of Health (DOH) Secretary Ted Herbosa tungod sa sunod-sunod nga mga kontrobersya nga giatubang sa iyang administrasyon sa ahensya.
Sumala ni Secretary-General Albert Pascual sa maong alyansa, usa sa mga nag-unang isyu mao ang pag-donate ni Herbosa og 620 million pesos sa World Health Organization niadtong 2024 samtang nag-antos ang mga pampublikong tambalanan sa kakuwang og mga tambal ug taas nga linya.
Dugang pa niini, kwestyonable matod pa ang pag-donate niini og 44.6 million pesos nga kantidad sa mga hapit na ma-expire nga psychiatric medicine ngadto sa Rotary Club sa Quezon City nga wala man untay lisensya sa pag-dispense niini.
Gibutyag usab sa opisyal nga ubos sa pagdumala ni Herbosa, miabot sa 1.5 billion pesos ang kantidad sa mga na-expire nga tambal ug bakuna, samtang gi-kwestyon usab ang pag-transfer sa 60 billion pesos nga pundo sa PhilHealth nga gideklarang unconstitutional sa Korte Suprema.
Gitumbok pa ni Pascual ang uban pang mga isyu sama sa pag-authorize og business class trip alang sa usa ka Usec ug ang problema sa unliquidated cash advances nga moabot og bilyon-bilyon ka pesos nga nagpakita sa gihulagway niyang kakulang sa maayong pagdumala sa Department of Health.
