Posibleng maglisod og depensa ang kampo ni Vice President Sara Duterte sa 3 ka articles of impeachment nga may kalabotan sa confidential funds, unexplained ill-gotten wealth, ug ang isyu sa pagpanuhol sa mga opisyal sa DepEd.
Kini ang gipadayag ni Cobbie Jan Canda sa Kabataan Partylist nga nagtuo nga kini nga mga isyu dugay na nga na-expose apan wala gihapon mahatagi og igong katin-awan.
Subay sa iyang pagsusi, tataw ang mga inconsistency sa Statement of Assets, Liabilities, and Net Worth kun SALN sa bise presidente kon itandi sa iyang tinuod nga mga assets ug net worth.
Bisan pa man sa naunang one-year ban gikan sa Supreme Court, giingon ni Canda nga mas lig-on na ang mga alegasyon karon ug ang mga articles of impeachment nga kinahanglan atubangon.
Tungod niini, gihulagway ni Canda nga mura na og gi-prito sa kaugalingong mantika ang bise presidente kay makita na gyud karon ang tukma nga mga basehan sa maong mga kaso.
