Kinahanglan pangandaman sa Department of Interior and Local Government (DILG) ug sa Philippine National Police (PNP) ang posibleng mga rally nga mahitabo sa adlaw sa impeachment sa Hulyo 6.
Kini ang gibutyag ni Atty Nazir Ynawat, National President – Alliance of Advocates of Federalism in the Philippines.
Miingon si Ynawat sa BOMBO RADYO nga natural lang nga mupatim-aw ang managlahing grupo nga mu-obserbar sa hearing, samtang ang uban mulusad sa lihok protesta ilabe kung nasayud sila nga gipihig ang ilang gisuportahan nga kampo.
Gani, gibana-bana ni Ynawat nga dili maundang ang mga rally hangtud sa aldaw nga mugula ang resulta sa impeachment.
Maoy angayan bantayan nga adlaw sa paghugot sa seguridad ang gitawag nga “judgment day”.
Dili gusto ni Ynawat nga masubli ang nahitabo sa panahon ni kanhi Presidente Joseph Estrada, diin ang pagdumili sa pag-abli sa usa ka envelope nag-aghat sa katawhan nga magprotesta ug nagdala sa dakong krisis sa politika sa nasod.
