Gikompirmar ni Nikko Duterte, Bombo International News Correspondent sa USA nga daghan ang mireklamo batok kang Marizel Cambri Yukee, usa ka Filipino-American nurse practitioner nga taga Tuguegarao City, Cagayan.
Siya gi-indict sa Houston, Texas tungod sa pagdumala sa scheme nga nagkantidad sa halos US 906 milyon O bana-bana sa ₱51.6 bilyon nga fraudulent claims batok sa Medicare ug TRICARE.
Miingon si Duterte nga gikan sa kapin 915 milyon US DOLLARS nga iyang gi-bill o gi-claim sa Medicare alang sa mga serbisyo nga iyang gi-provide, anaa sa hapit 200 milyon US DOLLARS ang iyang nakobra o nabayran kaniya sa gobyerno.
Lakip sa iyang modus ang paghimo sa mga peke o fraudulent nga mga serbisyo ug mga pamaagi (procedures) nga dili unta angay buhaton.
Pananglitan niini ang iyang gibutang o gi-charge sa claims ngadto sa mga tigulang nga pasyente (elderly patients) nga anaa sa mga hospice, assisted living facilities, o kadtong mga nagpuyo sa ilang kaugalingong balay.
Siya nabisto human mireklamo na ang iyang mga kliyente sa dili tawhanon nga pagpaningil kanila.
