Posibleng abrihan sa Senado ang usa ka selyadong kahon nga naglangkob sa income tax records ni Bise Presidente Sara Duterte atol sa impeachment trial.
Kini ang gibutyag ni Senate President Sherwin Gatchalian kay mahimo kini bisan pa wala pa namarkahan isip opisyal nga ebidensya sa pre-trial conference.
Ang kahon gikan sa Bureau of Internal Revenue (BIR) ug naglangkob kuno sa mga tax records ni Bise Presidente Duterte, sa iyang bana nga si Manases Carpio, ug sa ilang mga kompanya.
Naulahi ang pag-abli sa kahon tungod kay gihatagan pa sa higayon ang depensa nga mopahayag sa ilang komento bahin sa hangyo sa prosekusyon nga buksan kini.
Matod sa Senado, kinahanglan ang pagtugot sa Impeachment Court sa dili pa kini maablihan.
Gipasabut ni Gatchalian nga mahimo kini nga ablihan sa mismong trial proper kung ipresentar kini sa prosekusyon isip kabahin sa ilang ebidensya.
Ang tax records giandam nga ebidensya sa prosekusyon ilalom sa Article II sa Articles of Impeachment batok kang Bise Presidente Duterte, diin giakusahan siya sa pagkahimong adunay bahandi nga dili angay sa iyang kita ug sa dili kuno husto nga pagsiwalat sa iyang Statement of Assets, Liabilities, and Net Worth (SALN).
Ang sealed box unang gipadala sa BIR ngadto sa House Committee on Justice niadtong Abril ug dayon gibalhin sa Senado.
Gitakdang magsugod ang impeachment trial sa Senado sa Hulyo 6, 2026.
