Gimandoan ni Presidente Ferdinand Marcos Jr. ang mga ahensya sa edukasyon, kapolisan, panglawas, ug lokal nga kagamhanan nga pahugtan ang seguridad sa mga eskwelahan human sa nahitabong sunod-sunod nga trahedya sa nasod sama sa pagpamusil ug pagpanunggab sa Cavite ug Tacloban.
Matod sa Presidente, kinahanglang maprotektahan ang mga tinun-an batok sa harassment, pagpabaya, ug uban pang peligro aron magpabiling luwas nga dapit sa pagkat-on ang mga tunghaan.
Nagsubo usab ang panggamhanan sa pagkamatay sa duha ka student-athlete nga nalumos sa usa ka team building activity, hinungdan nga gipahinumdoman ang mga eskwelahan sa pagsunod sa mga lagda sa kaluwasan.
Gidasig ni Marcos Jr. sa mga ginikanan nga mohatag og oras ug pagtagad sa ilang mga anak, ug gipahimangnoan ang mga batan-on nga ang pagpangayo og tabang dili timailhan sa kahuyang.
