Nagpadayon ang dagkong protesta sa dakbayan sa Kraljevo, Serbia, bisan pa sa pahayag ni Presidente Aleksandar Vučić nga andam siyang mo-resign aron mahatagan og dalan ang pagpahigayon sa early elections.
Bisan niini, wala makombinsi ang mga nagprotesta, kay gituohan sa kadaghanan nga taktika lamang kini aron makapabilin gihapon siya sa impluwensya sa gobyerno pinaagi sa laing posisyon.
Misamot ang kasuko sa publiko human sa trahedya sa railway station sa Novi Sad niadtong 2024, diin ilang gibasol ang giingong kurapsyon ug kapabayaan sa mga opisyal.
Sa pagkakaron, wala pa maghatag og klarong timeline si Vučić kon kanus-a siya moubos sa katungdanan, maong nagpadayon ang panawagan sa mga demonstrador alang sa tinuod nga reporma ug pagpanubag sa gobyerno.
Nagpabilin nga tensiyonado ang sitwasyon sa Serbia samtang naghulat ang publiko sa sunod nga mga lakang sa administrasyon.
