Gipahugtan sa Department of Social Welfare and Development (DSWD) ang rehabilitasyon sa duha ka menor de edad nga nalambigit sa nahitabong pagpamusil sa usa ka tunghaan sa Tacloban City.
Sumala sa ahensya, kasamtangang anaa sa Regional Rehabilitation Center for Youth (RRCY) ang mga bata diin aduna silay eksklusibong psychologist, social worker, ug house parent nga nag-atiman kanila.
Sa pagkakaron, gipailawom pa sila sa hugot nga ‘psychological assessment’ ug wala pa tugoting makakomunikar sa ilang mga ginikanan samtang gihulat ang resulta nga maoy basehan sa sunod nga mga lakang sa ilang ‘intervention plan’.
Mahibaloang gihatagan usab og gibug-aton sa DSWD nga gawas sa posibleng epekto sa social media ug online games, dako usab og papel ang giya sa ginikanan ug suporta sa panimalay aron magmalampuson ang pagpahiuli sa maayong pamatasan sa mga bata.
