Gigamitan sa kapulisan sa Albania og tear gas ug water cannon ang mga raliyesta nga nagprotesta batok sa kagamhanan didto sa kaulohang dakbayan sa Tirana.
Miulbo ang kagubot sa dihang gipanglabayan og itlog ug harina sa mga nagprotesta ang mga pulis ug pipila ka magbabalaod sa gawas sa parlamento.
Tulo ka opisyal sa kapulisan ug usa ka raliyesta ang nangaangol sa nahitabong panagbangi, sumala sa report sa lokal nga media.
Kapin na sa usa ka bulan ang mga inadlaw-adlaw nga protesta tungod sa pasangil nga korapsyon sa mga proyekto sa kabaybayonan, lakip na ang luxury resort nga giplanohan sa umagad ni Donald Trump nga si Jared Kushner.
Hisayran nga bisan pa man nga gipanghimakak sa gobyerno ang maong mga akusasyon, padayon gihapon ang panawagan sa katawhan alang sa transparency ug kauswagan sa nasod.
