Misaka ug mas milig-on ang Philippine peso ug ang Philippine Stock Exchange index (PSEi) tungod sa maayong balita nga nakasulod na ang nasod sa “upper-middle-income status.”
Matod ni Rizal Commercial Banking Corp. (RCBC) chief economist Michael Ricafort, kining bag-ong klasipikasyon gikan sa World Bank makatabang sa pagsaka sa mga pamuhunan ug kredito sa nasod ubos sa mas maayong mga kondisyon.
Misaka ang bili sa Philippine peso og 5.6 sentimos ug misira kini sa ₱51.565 batok sa matag US$1, gikan sa pagsira niini sa ₱51.621 batok sa matag US$1 niadtong Miyerkules.
Hisayran nga gawas sa bag-ong status sa ekonomiya, nakatabang usab sa positibong dagan sa merkado ang pag-ubos sa presyo sa lana sa kalibutan ug ang nindot nga dagan sa manufacturing index sa nasod alang sa bulan sa Hunyo.
