Gisaysay ni kanhi Misamis Oriental Vice Governor Joey Pelaez nga gitugotan sa nasod sa Malaysia ang “caning” o ang pagbunal gamit ang stik isip silot aron madisiplina ang mga badlongong estudyante sa tunghaan.
Apan, bisan pa man niini, iyang giklaro nga wala siya mupabor sa maong bayolenteng pamaagi ug dili niya buot nga pasakitan o bunalan ang mga batan-ong tinun-an.
Gibutyag ni Pelaez, kinsa kanhi DepEd Executive Director for Communications Service – Communications Affairs nga dako ang iyang kabalaka tungod kay sa kasamtangang panahon, gihadlok na ang mga magtutudlo nga mudisiplina sa ilang mga estudyante tungod kay mahimo silang pasakaan sa sumbong ngadto sa Department of Social Welfare and Development (DSWD).
Gawas niini, aduna usab insidente nga gipangilkilan ang mga magtutudlo sa mga ginikanan aron dili mapasaka ang sumbong kay sigurado nga mapaksi ang ilang gihaguan nga lisensya.
