Giklaro ni Sentro ng mga Nagkakaisa at Progresibong Manggagawa o SENTRO Secretary General Josua Mata nga dili “living wage” o desenteng suholan ang hisgutan kon ang Regional Wage Board na ang molihok sa pagtakda sa sweldo sa nasod.
Siya miingon nga ang maong sistema nagmugna sa kahimtang diin ang National Capital Region lamang ang daling makabenepisyo samtang maghulat pa ang ubang mga rehiyon.
Alang kaniya, inay ibase sa tinuod nga panginahanglan sa pamilya, ang framework sa minimum wage sa tibuok nasod, nag-agad lamang sa gitawag nga “poverty threshold” alang sa lima ka miyembro sa pamilya.
Iyang gisaway nga ang tanang minimum wage nga kasamtangang gipatuman sa matag rehiyon layo ra kaayo ug mas ubos pa sa maong sukdanan sa kakabos.
Kini nagpakita lamang sa kapakyasan sa gobyerno sa paghatag og makiangayong suholan nga makabuhi sa matag mamumuong Pilipino.
