Gisaysay ni Palace Press Officer Undersecretary Claire Castro ang iyang tensyonadong kasinatian sa Canada diin giingong giatake ug gibastos sila sa pipila ka mga Pilipino samtang nag-shoot sa video alang sa pagbisita ni Presidente Ferdinand Marcos Jr.
Matod pa sa opisyal, kalit lang silang giduolan ug gisinggitan sa mga pulong nga nagdemanda sa pagluwat sa pwesto ni Pangulong Marcos, gawas pa sa personal nga pagpang-insulto nga iyang nadawat.
Tungod kay duha ra sila sa iyang kauban nga direktor, miangkon siya nga mibati’g kahadlok sa posibleng bayolenteng aksyon gikan sa maong grupo nga padayong misunod kanila.
Swerte na lamang nga daling nakatabang ang mga lokal nga kapulisan sa maong dapit aron masiguro ang ilang kaluwasan ug mapahunong ang maong pagpanghasi.
Taliwala sa hitabo iyang gipahinumdoman ang iyang mga isigka-Pilipino nga bisan pa man adunay kagawasan sa pagpahayag, dili kini rason aron magpakita og kawalay-tahod ug kangil-ad sa pamatasan ngadto sa uban.
