Naglisod ang mga awtoridad sa Romania sa pagpatuman sa mga balaod aron mapanalipdan ang mga residente ug turista batok sa mga pag-atake sa brown bear, samtang gidumala usab ang pinakadakong populasyon niini sa Europe gawas sa Russia.
Sa Transfagarasan mountain road, kapin sa 20 ka brown bear ang migawas sa lasang ug miduol sa mga motorista nga wala motuman sa balaod nga nagdili sa pagpakaon sa mga oso ug pagduol niini aron magkuha sa litrato o selfie.
Sumala sa Ministry of Environment sa Romania, adunay gibana-banang 10,000 hangtod 13,000 ka brown bear sa nasod, ug dul-an sa 30 ka tawo ang namatay tungod sa pag-atake sa oso sulod sa miaging duha ka dekada.
Aron mapugngan ang dugang pag-atake, gidoble sa Romania ang tinuig nga hunting quota ngadto sa hapit 900 ka oso, apan matod sa mga eksperto ug conservationists, kinahanglan usab nga palig-onon ang pagpatuman sa mga balaod ug ubang non-lethal nga mga lakang aron mas epektibong masulbad ang nagkadaghang pagsulod sa mga oso sa mga komunidad.
