Gipadayag sa Police Regional Office 10 nga pabilin nilang gipahugtan ang kampanya batok sa mga ilegal nga kalihokan pinaagi sa pagsukpo sa mga ginagamit nga nagkadaiyang taktika sa pagtago sa mga ilegal nga kontrabando.
Sumala ni Police Major Joann Navarro, spokesperson sa PRO-10, nasabtan ug na-establisar na sa kapulisan ang modus sa mga ilegalista nga naggamit og customized compartments sa mga truck aron itago ang ilang mga kargamento.
Bisan pa man sa mga pamaagi sa mga kriminal aron makalusot, napakyas gihapon kini tungod sa maayong koordinasyon ug validated intelligence reports gikan sa komunidad.
Giangkon sa kapulisan nga aduna pa gihapoy pipila nga nakalabang, apan gipasalig sa otoridad nga dili na kini sayon alang sa mga iligalista tungod sa mas gipahugtan nga pag-inspeksyon.
Ang maong kalampusan nagpakita lamang nga wala gyud gina-tolerate sa kapulisan ang bisan unsang porma sa krimen ug ilegal nga aktibidad sa rehiyon.
Naghangyo ang PRO-10 sa publiko nga magpabilin nga matngon ug padayon nga motabang sa paghatag sa impormasyon aron mapanalipdan ang kaluwasan sa tanan.
