Gikinahanglan nga mupasa sa affidavit ang pipila sa mga kanhi “bagmen” nga nagtestigo sa giingong anomalya sa mga flood control projects.
Sumala sa abogado sa mga ‘ex-bagmen’ nga si Atty. Levi Baligod, ang tumong sa pagpasa og affidavit kay aron ilimod ang mga pamahayag sa upat ka indibidwal nga nagbakwi sa ilang mga testimonya tungod kay giingong gipugos lamang sila.
Sa 18 ka “ex-bagmen,” 8 kanila ang nakahatag na og affidavit, apan ang 4 kanila ang nagbakwi sa ilahang testimonya.
Dugtong niini, si Atty. Baligod kauban ang mga abogado sa Ombudsman kay nag-andam na karon og mga affidavit gikan sa mga nakasaksi sa proseso aron pamatud-an nga walay nahitabong pagpamugos sa gipagawas nga mga testimonya sa mga kanhi bagmen kalabot sa mga anomalya sa mga flood control projects. (raniel mahunyag)
