Misaka pa sa 3 ka tawo ang patay sa pag-atake sa duha ka tugpahanan sa Kingdom of Saudi Arabia.
Kini ang gikompirmar sa Saudi General Authority of Civil Aviation human gipabuthan ang ilang Abha International Airport sa southwestern Saudi Arabia ug King Khalid International Airport sa Riyadh kaniadtong Martes ug Miyerkules.
Sa Abha airport, duha ka babaye nga residente nga Marokano ug Algeriano ang namatay samtang 28 pa ang nasamdan gikan sa gamay hangtod kritikal nga kadaot.
Sa King Khalid airport, usa ka Sudanese nga residente ang namatay ug walo pa ang nasamdan nga adunay lain-laing grado sa kadaot.
Ang tanan nga nasamdan gidala sa ospital alang sa pagtambal ug ang duha ka pag-atake nakadaot usab sa kabtangan.
Gipahibalo sa awtoridad nga nagtinabangay sila sa mga ahensya aron masusi ang kadaot, masiguro ang kaluwasan sa pasilidad sa airport, ug magpatuman sa gikinahanglan nga lakang aron mapanalipdan ang mga pasahero ug mapadayon ang seguridad sa sistema sa sibil nga eroplano sa Saudi Arabia.
