Gipasidaan sa Kilusang Mayo Uno ang gobyerno nga posibleng mobuto usab sa Pilipinas ang dakong protesta parehas sa France kon magpadayon ang pagpabungol-bungol sa hangyo sa mga katawhan.
Gipadayag ni Kilusang Mayo Uno Secretary General Jerome Adonis nga gidayeg sa pundok ang kaisog sa mga batan-on sa Pransya batok sa budget cut sa edukasyon ug panglawas apan nagatuo ang grupo nga dili kinahanglang moabot sa pagguba ug pagpangdaot sa kabtangan ang lihok-protesta sa nasud.
Tungod niini, gipahimangnoan sa lider ang gobyerno sa Pilipinas nga angay paminawon ang lehitimong panawagan sa katawhan imbes nga hulaton pa ang pag-ulbo sa kasuko sa publiko.
Hinoon, nagpabilin nga dakong inspirasyon sa kapunongan ang pagbarog sa mga mamumuo sa ubang nasud aron mas mapalig-on pa ang pagpanalipod sa batakang kinahanglanon sa mga Pilipinos.
