Mipirma og kasabutan ang Department of Agriculture–Regional Field Office 10 (DA-RFO 10) ug Nestlé Philippines niadtong Biyernes aron ilusad ang Mindanao Integrated Coffee Development and Genetic Resource Program, nga nagtumong sa pagpauswag sa produksyon ug kalidad sa kape sa Mindanao.
Kabahin sa programa ang pagtukod og National Coffee Genetic Resource Repository sa Northern Mindanao Agricultural Crops and Livestock Research Complex (NMACLRC) didto sa Malaybalay City, Bukidnon, alang sa pagtipig ug pagpanukiduki sa mga genetic resource sa kape.
Tumong usab sa programa nga mapataas ang abot sa kape ngadto sa usa ka metriko tonelada matag ektarya pinaagi sa paggamit sa de-kalidad nga mga barayti sa Robusta, siyentipikong panukiduki ug maayong pamaagi sa pag-uma.
Dugang niini, suportahan usab ang mga mag-uuma pinaagi sa mga pagsulay sa pagtanum, pagbansay sa regenerative agriculture ug pagpalambo sa mga nursery ug pasilidad alang sa panukiduki. (raniel mahunyag)
