Natuman sa aktres ug advocate nga si Isabelle Daza ang iyang saad nga motabang sa paghatag og limpyo ug mainom nga tubig sa mga residente sa Ave Maria, usa ka komunidad sa Gawad Kalinga sa Tanay, Rizal.
Iyang gipakita pinaagi sa Instagram ang bag-ong natukod nga submersible water pump, off-grid solar power system, mga tangke sa tubig ug sistema sa pagsala nga nagtugot sa distribusyon sa tubig ngadto sa mga kabalayan.
Nahimo ang maong proyekto pinaagi sa suporta sa non-governmental organization nga Waves for Water, nga midonar og mga kagamitan human mahibaloan ang panginahanglan sa komunidad pinaagi sa naunang post ni Daza sa social media.
Gawas sa maong kalamboan, gipahibalo usab ni Daza ang mga plano alang sa sunod nga hugna sa proyekto, lakip ang paghatag og elektrisidad ug internet access ug ang pagtukod og community center nga mosuporta sa panginabuhian ug pagtuon sa mga residente. (raniel mahunyag)
