Gipadayag sa Armed Forces of the Philippines (AFP) nga andam silang mohatag og suporta kon ugaling hangyoon sa Philippine National Police (PNP) ang ilang tabang sa pagsikop kang Senador Ronald “Bato” dela Rosa.
Matud ni AFP spokesperson Col. Francel Padilla, ang PNP ang nag-unang ahensya sa pagdumala sa ingon niining hisgutanan, apan andam motabang ang AFP kon ugaling hangyoon sila sa kapulisan tungod kay usa lamang ang ilang tumong nga mao ang paghatag og seguridad taliwala sa mga gakahitabong krimen sa nasud.
Dugang pa sa tigpamaba, andam kaayo silang motabang ilabi na sa pagpaniktik ug sa joint operations nga gikinahanglan ang ilang presensya.
Mahinumdoman nga gihatagan si dela Rosa og usa ka semanang ultimatum sa PNP aron mo-surrender ngadto sa mga otoridad. (raniel mahunyag)
