Namatay ang usa ka negosyante human sa nahitabong pagpamusil sa sulod sa Haifa Palace compound sa Barangay Gadongan, Marawi City, Lanao del Sur, karong adlawng Martes, Nobyembre 3, 2026.
Giila ang namatay nga si Daud Ayo Ali, residente sa maong barangay, samtang wala usab maunsa ang kauban niini nga si alyas Ans.
Nasikop usab ang 2 ka gidudahang suspek sa maong insidente nga si alyas Pingko ug alyas Malic.
Basi sa inisyal nga imbestigasyon sa Marawi City Police Station, nagsugod matud pa ang maong insidente sa dugay nga panag-away sa hisgutanan sa panag-iya sa yuta tali ni alyas Tom ug alyas Ans.
Nasayran nga aduna usab may nahitabong unang komprontasyon niadtong Oktubre ning tuiga nga gikalambigitan sa ilang mga anak tungod sa maong away.
Sumala sa report, nagkita pag-usab sila si Tom ug Ans sa sulod sa Haifa Palace compound samtang kauban matud pa ni Ans ang iyang anak.
Misangpot kini sa usa ka init nga komprontasyon diin naigo og tulo ka bala ang itom nga Toyota Hilux nga gimaneho ni Daud Ayo Ali.
Sa ulahi, miabot matud pa ang grupo ni Daud ug niresulta sa armadong engkwentro ang maong insidente, nga hinungdan sa kamatayon sa maong negosyante.
Dali dayon nga nagpahigayon og hot pursuit operation ang mga sakop sa Marawi City Police Station, uban sa tabang sa uban pang police units, nga miresulta sa pagkasikop ni Tomawis ug Malic sa sulod gihapon sa Haifa Palace compound, duol sa Petron Gas Station.
Gidala na sa Marawi City Police Station ang duha ka suspek alang sa dokumentasyon ug dugang nga imbestigasyon, samtang giandam na usab ang mga kinahanglan dokumento alang sa pagpasaka sa tukmang kaso.
Padayon pa ghapong gisusi sa mga otoridad ang tibuok detalye ug motibo luyo sa maong insidente. (raniel mahunyag)
