Gipasiugda sa Malacañang nga dili manghilabot si Presidente Ferdinand Marcos Jr. sa trabaho ug desisyon sa Kamara ug Senado bahin sa 2027 General Apropriations Bill (GAB).
Matud ni Palace Press Officer ug Presidential Communications Office Undersecretary Claire Castro, moagi pa sa hugot nga pagsusi ang sugyot nga badyet, lakip niini ang bicameral conference committee ug economic team sa presidente, ayha kini pirmahan.
Gipamugos usab ni Castro nga nagtinguha ang Presidente nga dili makulangan ang mga proyekto nga nahilakip sa sugyot nga badyet sa Executive Department aron malikayan ang pagkalangan niini.
Dugtong niini, mipahayag usab si Castro nga andam matud pa ang Presidente nga gamiton ang iyang veto power kung gikinahanglan aron masiguro nga dili masayang o maabusaran ang pondo nasud. (raniel mahunyag)
