Gipaabot pa sa palasyo ang kumpirmasyon gikan sa Department of Foreign Affairs (DFA) mahitungod sa gikatahong panag-istoryahanay ni Chinese Foreign Minister Wang Yi ug Foreign Affairs Secretary Ma. Theresa Lazaro.
Matud ni Presidential Communications Office (PCO) Undersecretary Claire Castro, maayong balita kung nahitabo ang maong panag-istoryahanay.
Bisan pa niana, gipatin-aw ni Castro nga wala kini magpasabot nga undangon na sa Pilipinas ang pagpanalipod sa katungod ug interes niini sa West Philippine Sea.
Dugtong niini, gipasiugda usab ni Castro nga angay ipaagi sa diplomasya ang pagpakigdayalogo tali sa ubang nasud samtang padayong gipanalipdan ang teritoryo sa nasud. (raniel mahunyag)
