Segun sa gipahugot nga pamaagi sa pang-gobyerno didto sa Estados Unidos, nabalaka ug gikulbaan karon ang mga Filipino ug uban pang mga immigrants sa maong nasud.
Gibutyag ni Bombo International News Correspondent Jimboy Chaves gikan sa Washington D.C. sa iyang interbyu sa Bombo Radyo, nga brutal ug grabe ka-estrikto karon ang mga patakaran sa immigration nga nahimo usab nga dakong isyu sa gipahigayon nga US Midterm Elections.
Dugang pa ni Chaves gikan sa iyang nakita sa iyang trabahoan sa airport, adunay igong gahum ang Immigration and Customs Enforcement o ICE nga mo-aresto ug mag-detain sa bisan kinsang immigrant nga adunay gamay nga bikil, bisan pa man kon kompleto ug sakto ang ilang mga papelis.
Luyo sa maong sitwasyon, giklaro sa correspondent nga dako ang kahadlok ug kakulba karon sa mga katawhan nga mo-gawas sa ilahang mga puy-anan.
