Nagpabilin ang panghinaot sa mga Pilipino sa Estados Unidos nga dili madamay sa mga aksyon batok sa undocumented immigrants subay sa resulta sa US Midterm Elections.
Sa pakighinabi sa Bombo Radyo kang Randy Famacion, Bombo International News Correspondent sa Chicago, Illinois, gipasabut niini nga adunay dakong kausaban sa pagtratar sa mga immigrants depende kon kinsang partido ang magdumala sa lehislatura.
Matod ni Famacion, kasagaran sa mga Democrats mas paborable ug bukas sa mga legal ug undocumented immigrants, diin aduna pay panawagan gikan sa pipila nga i-abolish ang Immigration and Customs Enforcement o ICE.
Samtang ang mga Republicans mas nakapokus sa pagpahigayon og mas hugot nga mga regulasyon batok sa mga iligal nga sakop sa nasud.
Gidugang pa ni Famacion nga labing importante nga masabtan ang kalainan sa duha ka partido, apan dako ang paglaum nga maprotektahan ang mga Pilipino tungod sa ilang kakugi, dedikasyon, ug kaayo sa trabaho sa America.
