Gikumpirma sa Office of the Vice President (OVP) nga mobiyahe si Vice President Sara Duterte paingon sa Hong Kong gikan Nobyembre 6 hangtod 8, 2026 aron motambong sa nagkadaiyang aktibidad lakip ang usa ka kalihokan nga gi-organisa sa Filipino Community (FilCom).
Gipahibalo sa OVP nga nakakuha na ang Bise Presidente sa pagtugot gikan sa Regional Trial Court sa Quezon City, Branch 98 pinaagi sa usa ka kamanduan nga gipetsahan sa Nobyembre 3, lakip na ang travel authority gikan sa Office of the President.
Gipasabot usab sa maong opisina nga personal nga pondo ni Duterte ang gamiton sa biyahe ug walay pondo, kagamitan, o pasilidad sa gobyerno nga magamit alang niini.
Wala na maghatag ang OVP sa dugang detalye bahin sa uban pang mga kalihokan ni VP Sara atol sa iyang pagbisita sa Hong Kong.
