Gipanghimakak ni House prosecution spokesperson Ace Barbers ang mga alegasyon nga gimanipular o gihimo-gimo lamang ang mga ebidensiyang gigamit batok kang Bise Presidente Sara Duterte sa impeachment proceedings.
Matod sa kongresista, ang mga numero ug dokumentong gipresentar naggikan sa kasaligan nga mga institusyon sama sa mga ahensya sa gobyerno ug mga bangko.
Giingon usab niini nga ang mga rekord wala imbentohi sa House prosecution team kondili gikan mismo sa mga dokumentong nalambigit sa kampo sa bise presidente.
Gipamugos ni Barbers nga lig-on ang mga ebidensiyang gisumite ngadto sa mga senator-judges aron ilang masusi ug timbang-timbangan.
Gitugyan sa prosekusyon ngadto sa Senado ang paghatag sa katapusang desisyon base sa mga ebidensiya ug testimonya nga ilang nadungog ug narepaso.
