DUGONG BOMBO 2026: “A Little Pain, A Life to Gain”
Press Release
Gisugdan na sa Bombo Radyo Philippines, uban sa Bombo Radyo Philippines Foundation, Inc. ug sa Philippine Red Cross, ning adlawa, Nobyembre 14, 2026, ang Dugong Bombo 2026. Kini nga blood donation drive maoy kinadak-an, sulod sa usa ka adlaw nga boluntaryong kampanya sa pagdonar sa dugo sa nasud nga ipahigayon dungan sa 25 ka importanteng lugar sa tibuok Pilipinas nga adunay BOMBO RADYO ug Star FM Station
Mas espesyal ang selebrasyon karong tuiga samtang gisaulog sa Bombo Radyo Philippines ang ika-60 ka tuig sa kahusayan sa media ug kapin sa 20 ka tuig sa padayon nga serbisyo publiko ug boluntaryong pag-alagad pinaagi sa programa nga Dugong Bombo.
Sulod sa kapin duha ka dekada, ang Dugong Bombo nahimong simbolo sa lig-on nga pagpasalig sa Bombo Radyo Philippines sa serbisyo-komunidad ug makatawhanong kalihokan. Gikan sa usa lamang ka inisyatiba aron madasig ang boluntaryong pagdonar og dugo, kini mitubo ngadto sa usa ka nasudnong kalihokan nga naghiusa sa liboan ka mga Pilipino nga adunay usa ka tumong, ang pagluwas og kinabuhi.
Sa nagkalain-laing bahin sa nasud, ang mga ahensya sa gobyerno, civic organizations, relihiyosong grupo, mga eskwelahan, uniformed personnel, pribadong kompanya ug indibidwal nga mga donor nagpakita na usab sa ilang kaisog, kaluoy ug pagkamanggihatagon pinaagi sa ilang pag-apil. Nagpakita kini sa lig-on nga espiritu sa boluntaryong serbisyo ug sa atong kolektibong responsibilidad sa pagtabang sa mga nanginahanglan.
Sulod sa kapin 20 ka tuig, nahimong kasaligan nga tinubdan sa dugo alang sa mga blood bank, ospital ug emergency response units ang Dugong Bombo, nga nakahatag na og liboan ka bag sa dugo nga nakaluwas sa dili maihap nga mga kinabuhi. Gawas sa tinuig nga bloodletting activity, nagpadayon usab kini sa pagdasig sa komunidad nga himuong kabahin sa ilang kinabuhi ang boluntaryong pagdonar og dugo ug makatawhanong serbisyo.
Giya sa tema nga “A Little Pain, A Life to Gain,” gipahinumduman ang matag Pilipino nga bisan gamay lamang ang kasakit ug pipila ka minuto ang gikinahanglan sa pagdonar og dugo, dako kini og mahimong papel sa pagluwas sa usa ka kinabuhi nga anaa sa kritikal nga sitwasyon. Bisan pa sa kalamboan sa medisina ug teknolohiya, wala gihapoy kapuli ang dugo sa tawo kon kini gikinahanglan dayon.
Samtang nagpadayon ang Dugong Bombo 2026 sa 25 ka importanteng lugar sa nasud, gipadayag pag-usab sa Bombo Radyo Philippines, kauban ang Bombo Radyo Philippines Foundation, Inc. ug Philippine Red Cross, ang ilang pasalig sa serbisyo publiko, boluntaryong pag-alagad, pagpalig-on sa komunidad ug nation-building.
Sa katapusan, nagpasalamat ang Bombo Radyo Philippines sa tanang stakeholders, sponsors, partner organizations, volunteers ug blood donors nga naghimo sa Dugong Bombo 2026 nga usa ka talagsaong adlaw sa kaluoy, pagkamanggihatagon ug boluntaryong serbisyo.
Daghang salamat sa inyong suporta ug sa inyong pagpakita sa tinuod nga kahulugan sa serbisyo publiko pinaagi sa paghatag og dugo aron makaluwas og kinabuhi.
Basta Radyo… BOMBO!
.jpg "Usec. Castro, gipatin-aw nga bahin sa legal nga proseso ang extradition warrant batok kang Pastor Apollo Quiboloy")
